Morél Gioann
NA STÒRIA
.o0o.
A l'era squasi nià
antratant ch'a novava,
tanti ani fà,
andova 'l corenton
dël fium a l'é pì fòrt,
sota 'l rivass
àut ëd j'arbron.
A dis ch'a l'é nen mòrt,
giù drinta l'angorgh
ch'a lo tirava,
përchè sprozendse leste dzora l'eva
l'han ciapalo le man
bianche 'd soa mama
alvandlo sù dosman.
E costa stòria a l'ha contàjla a tuti,
për tut cost temp,
a tuti 'nt ël pais,
giontandje con la mama
ël bate dj'ale dj'angelèt dël cél
e ij Sant dël Paradis.
A l'ha pì nen n'amis,
gnanca 'l prevòst lo scota,
ëdcò soa fomna
a l'ha piantalo,
lassandlo sol con soe drolarìe.
L'é tròp divers, a viv ëd fantasìe.
Lagiù 'nt la val, ël fium ancor sgiafela
la tèra dël rivass
co'ij frissonant arbron ëd sentinela.
...
|
|
|
|
|
|