Enrico Botturi
In maschera
**************
Doman l'è sabet grass:
doman me metti in maschera!
«Come? Tì, vecc?...
Te ridarann adree...»
Ti secca nò, coscienza,
SEMEL IN ANNO...
sarà quell che sarà!
E...me vestissi come?
De Pantalon? nò...nò!
Sta maschera famosa
mì doaria portalla per tutt l'ann
perchè son vun di pocch
che paga...e tâs.
E allora...de Arlecchin?
L'è nò on vestii per mì
ma per chì, segond l'umor,
el cambia de color...
Forsi la palandranna
del Dottor Balanzon?
La me va minga ben:
ghe voeur on bell voson
e poeu la tolla classica
per savè trombonnà
di paroll a sproposit
che sappien incantà
Mei 'l Pierrot lunatich,
romantegh e simpatich,
che 'l sospira a la luna
con tanta nostalgia...
Ma no...ma no!
Questa l'è poesia:
robba che al dì d'incoeu
se voeur sbatt via.
Vestiss de Porcinella?
L'è tropp meridional...
Rugantin?
L'è on tipo prepotent
che no 'l me piâs per nient!
Basta! Hoo decis: anca sto carneval
voo in gir con la mia faccia natural.
In sto mond de pajasc
l'è l'unica manera
per viv. incognit, la toa vitta vera.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
