Giuseppe Margorani
Vers doman...
******************
Tripillen i foiett
di pobbi tutti in fila adree al fossett
e l'aria che ie moeuv in de la sera
l'è me on tevid respir
che passa sora a l'acqua quietta quietta
quasi come on segnal de primavera...
El ciel l'è trebulaa,
gh'è tanto moviment,
forse perchè là in alt
giuga magari el vent
che'l se cerca ona strada per andà
come l'è soa natura...
Intan ven scur e in gir
la campagna l'è quietta,
quietta coi sò color
che sbiavissen per perdess in del nient,
el nient che l'è on quaicòss
che gh'ha minga né forma né misura,
che se sa nò 'se l'è
ma che tutti semm ben però che'l gh'è
e in fond el fa paura...
I pobbi, cont i foeui che s'hinn fermaa,
hinn lì in de l'ombra scura
e guarden el fossett
con l'acqua che se moeuv e che sottvos
la cunta sù di stori
che nissun pò cap'...
Giornada e sera hinn mort,
riva la nott e inscì
el temp el se consuma
e rivarà doman
cont el sò noeuv tran tran
e come ier la gent la sperarà,
inscì, senza savè,
e la andarà a incontrà alter perchè...!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
