Che vallemi
Enrique Torres rembiapokue
Oiméne tajy poty pe yvyty omopytamba,
oiméne hyakuã porã opa rupi ka’aguy;
oiméne ku mainumby ovy’a ha isaraki;
maymába guyramimi ijayvu ha opurahéi,
che py’águi ndojeivéi upe che Paraguaimi.
Umi ysysrymimi panambi oñuãmba,
ha oime culantrilloita hembére ojererei,
"lantén" peteitei ku hogue hovy asy;
hi’ari katu ipoty aguape kyryi guasu,
ha iguý iñanambusu ju’i rupi’a aky.
ku azucena okuirei hyakuãngue nemoanga’u,
panambi hovy guasu oveve ñemi ñemi;
oiméne ku guyra’i opa rupi ojaitypo
eirarúa omono’õ yvotýpe omburea,
upéva ijeirarã oipyte ha ohykue’o.
Oiméne hyakuã porã yvytu yvytýgui oúva
amambái ryakuã oguerúva ka’aru ro’ysã porã;
oiméne ijayvujoa umi ykuágui oúva,
iñakã ári oguerúva kambuchi ha hy’akuã;
hi’ãnte chéve ahecha upe che valle ahayhúva.
Oiméne ynambu sevói pe ñúre morotimba,
tetêu ijayvujoa jahasávo iñangekói;
hi’ãvaicha cherenoi che retãmi porãite,
ha oime che rembiayhumi cherechaséva avei,
cherayhúpa gueteri ahayhuhá ichupe.
El tiempo hatã oiko,ñane akã omoapati
ñande rova omocha’i ha ndaikatúi jajoko;
nahi’ãi chéve amano mombyryete ndehegui,
aháne rohechami, che akãme roguerekóva,
ha amóme avei che’ãhóva rohechanga’uguiai.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
