Gigi Fossati
Polesine
.o00o.
Tera e aqua, aqua e tera
da putini che da grandi:
«Siora tera, ai so comandi,
siora aqua, bonasera;
bonasera».
Tera e aqua! Se lavora
soto un sole che cusina...
tera e aqua! A la matina
se scomissia de bonora;
de bonora.
Tera e aqua! Tera nuda,
gnente piante, gnente ombrìa.
Sta fadiga mai finìa:
la comanda che se suda;
che se suda.
Tera e aqua! A mezogiorno
quel paneto che se magna
no gh'è aqua che lo bagna
e ghè aqua tuto intorno;
tuto intorno.
Tera e aqua! Co vien sera
tuti intorno, dona e fioi,
a una tecia de fasioi,
se ghe fa un bona siera;
bona siera.
Tera e aqua! Po a la note
se se buta sora el leto
e se sogna, par dispeto
aqua e tera, piene e rote;
piene e rote.
Sempre aqua e sempre tera
da putini che da grandi:
«Siora tera, ai so comandi...»;
po se crepa e... bonasera;
bonasera.
Canzone scritta nel 1961, testo di Gigi Fossati, musica di Sergio Liberovici.
...
|
|
|
|
|
|