Ab grèu cossire
Bernart Sicart de Marjevols
*******************************
Ab grèu cossire
Fau sirventés cozen,
Dieus! qui pòt dire
Ni saber lo turmen?
Qu'ieu, quan m'albire,
Sui en gran pessamen,
Non puesc escrire
L'ira ni'l marrimen,
Que'l sègle torbat vei,
E corromp on la lei
E sagramen e fei
Qu'usquecs pessa que vensa
Son par ab malvolensa,
E d'aucir lor e sei,
Ses razon e ses drei.
Tot jorn m'azire
Et ai aziramen,
La nuech sospire
E velhan e dormen,
Vas on que'm vire
Aug la cortesa gen
Que cridon «Sire»
Al Francés umilmen.
Mercé an li Francei,
Ab que vejo'l conrei,
Que autre drech no'i vei.
Ai, Tolosa e Proensa
Et la terra d'Agensa,
Berzèrs e Carcassei,
Que vos vi e quo'us vei!
Cavalaria,
Ospital ni Maizós,
Òrdes que sia
No m'es plazens ni bos.
Ab gran bauzia
Los truep et orgulhós,
Ab simonia,
Ab grans possessiós.
Ja non èr apelatz
Qui non a grans rictatz
O bonas eretatz;
Aquelhs an l'aondansa
E la gran benenansa;
Enjans e traciós
Es lor cofessiós.
Franca clercia
Gran ben dei dir de vos,
E s'ieu podia
Diria'n per un dos:
Gen tenètz via
Et ensenhatz la nos;
Mas qui ben guia
N'aura bos gazardós.
Res no vei que'us laissatz,
Tan quan podètz donatz,
Non aut[at]z cobeitatz,
Sofrètz grèu malanansa
E vistètz ses coindansa.
Mielhs valha Dieus a nos,
Qu'ieu no die ver de vos!
Si quo'l salvatges
Per lag temps mòu son chan,
Es mos coratges
Qu'ieu chante derenan;
E quar paratges
Si vai aderrairan,
E bos linhatges
Decazen e falsan,
E creis la malvestatz,
E'ls barós rebuzatz
Bauzadors e bauzatz,
Valor menon derrèira
E desonor primèira,
Àvols rics ...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
