Gigi Simoncini
Tänp indrî zicléssta ed bravûra, incû l é un pensionè cuntänt.
Un tempo valente ciclista, è oggi un felice pensionato.
Gustén e i ucèl mâgic (1997)
Girànd trancuéll pr al zänter dla zitè,
guardànd con intarès tótt i mustrén,
la sô atenziån la fó calamitè
da qualla d n òtic. E qué as farmé Gustén.
In måsstra un pèr d ucèl ecezionèl
che s't i infurchèv te vdêv travêrs ai ftièri.
Äl länt fâti d un vaider tótt spezièl...
"S'l é vaira - al pensé - l é un quèl straurdinèri!"
Dezîs, l entré dmandànd d psairi pruvèr
par sinzerères ch'la n fóss n'inbidunè.
"Ch'al guèrda mò cla spåusa drî a pasèr,
acsé al s cunvénz ch'l'é tótta veritè".
Gustén al guardé drétt a sta dunèla
e, vdandla tótta nûda, al s incanté.
Cavànds i ucèl, l'êra con la stanèla
e al déss "Quasst l é un mirâcuel da avanzèr insmé!"
Pén d entusièsum, col côr ch'fèva i saltón,
al dmandé al prêzi dezîs a fèr l acuésst.
Al gé al cumàss "Pôc manc ed dû miglión.
I én tant, mo al vadd tótt nûd sänz'èser vésst!"
Al curé a cà con i sû ucèl só l nès
e, vrand pian l óss, in fånnd al curidûr
al vdé al pustén e sô mujêr nûd nèd.
Ló al s mité a rédder pugiàndes cåntr al mûr.
Cavànds i ucèl, la sêna la n canbièva:
pustén e sô mujêr, sänper acsé.
Gustén al s incazé, quèsi al biastmèva,
e al déss: "I én bèle rótt pròpri al prémm dé!"
...
|
|
|
|
|
|