Antonio Negri
On soldaa papà
****************
Intorna a mezzanott s'eri per strada,
Tornavi al cobbi, soll, in de per mì,
Col coo pien del frecass de la serada
Che m'era pertuccaa de digerì...
Quand, tutt a 'n tratt, in del svoltà 'n canton,
Me se para denanz on soldaron!
Naturalment..., inscì per dagh el pass,
Me tiri d'ona part; ma 'l soldaron,
On ambrosian, pregandem de fermass,
El me ranfa el s'giacché col so sciampon
E lì, cont ona vôs de bass profond,
El me cunta che 'l ven de l'alter mond!
«Mì me n'infà» rispondi on poo sorprês,
Convint che se trattass d'on poër matt,
«Hoo appena digerii vun de quii pês
Che proppi, cara lù...» - «Fermo, el ribatt,
El scior che m'ha ciamaa l'è on mè collega?
E lù 'lgh'ha mai de dimm che se ne frega!
«Eh? cosse'l dis? ciamaa d'on mè collega?
Ma se lù el sa nanca chi me sia...
Se sont on impiegaa..., se gh'hoo bottega...»
«Ma soo che lù, l'insist cont energia,
L'è staa, compagn de mì, papà soldaa...
Domà che lù...nissun l'ha mai sfalzaa!
Invece mì...;l'ha no sentii stassera
Quell so collega...come 'l m'ha consciaa?
Che el disa lù...l'è quella la manera
De maltrattà la santa verità?
On poetta el dêv savè che i mort in guerra
Senten tutt coss anbên che sien sott terra!»
[...]
Aspart del quader...che'l fa rîd i puj...
Andèmm, sûr Atimada, l'ha mai vist,
Lu che 'l gh'ha minga i mezzanitt che buj,
A'ndà a spass, in del sèdes, quii poer crist
Che tornava a Milan de la tricera?
E j ha vardaa ben ben polito in cera?
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
