Cesare Crespi
Brera
*******
Brera vero borgh in la cittaa,
sit de la mia infanzia ormai lontana,
quand el Navilli el te bagnava i caa
e intorna gh'era on'aria paesana,
se sari i oeucc me par de ritrovaa
tutt quell che torna pu, che m'à lassaa.
Rivedi el Theobroma, el Tombon,
el Geri in di Fior Scur, la Farmacia,
l'Adelasio, la Galeria del Milion,
el Carletto propri in faccia a casa mia,
el tramm del ses che andava al Cimiteri,
l'omett del disco ross attent e seri.
Poeu la guerra e i bomb. Oh cara vitta!
Chi se saria poduu immaginà
che saltass foeura ona sciora Titta,
con quel che l'ha traa in pee e che l'ha faa
per tì Brera, per l'Art, per i pittor,
quajvun, incoeu, Maester de valor!
Brera ormai cittaa nella cittaa,
sit de la mia infanzia ormai lontana,
gh'è pu el Navilli che te bagna i caa,
l'è scomparsa anca l'aria paesana,
eppur la gent la ven per ritrovaa
l'odor de l'art ormai desmentegaa.
E i tò ringher, e certi cortilett,
sconduu per el pudor de fass vedè,
el va e ven su e giò per i stradett
sbirolent e senza marciapè
per ritrovà ona vitta che de sera
se respira solament a Brera,
e i tò color...Chi ven resta de stucch:
mì stess, che te conossi e sont di tò,
me guardi intorna come on mammalucch
e pensi: 'me se fà, come se pò
cambià quartier, andà lontan de tì?
Per mì saria la fin, l'è mej morì.
Per sto motiv hoo mai cambiaa de cà
e anca se me insebissen on castell
mai e poeu mai podaria lassà
Fior Chiar, el mè cortil che l'è inscì bell.
Perchè ...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
