Piera Bottini
La cassina
**************
El ninna el vent i pobbi
in mezz a la gran pas de la campagna
e l'ultim sô el carezza la cassina.
De sòtt al portegh cont in scoss la scianna
pisòcca pipa in bocca el vecc paisan
e dent i serc de fumm...nassen ricord,
davanti ai oeucc tobis hinn lì tucc viv
e in de l'ombrìa el gòd la libertà
de usmà e scoltà...vos e profumm
che lù l'ha pròppi mai desmentegaa.
Vos e frecass de stalla,
odor de terra, quella
anmò dent i sò man,
profumm de fen, de loeuv e de foiamm,
sgarr de patan, de gioin sora l'era
cont i canzon di dònn e di tosann.
Poeu tutt svaniss 'me on gioeugh de gibigiann
e in del silenzi che le mett in cros,
cont el magon che ghe se stròzza in gola,
in d'on ti-tich ti-tach de pass strusaa
el guzza i oeucc sora la soa campagna
doe gh'è i radis de tutti i sò de cà
e in del reciòcch del son d'ona campana
el biassa on'orazion per fà tornà
...brasc giovin de volontà
per onorà la terra...in onestà!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
