Caterina Sangalli Bianchi
Pee in cornis
**************************
Pien de taj, de duroni, de carpogn,
gh'hoo denanz i tò pee, ancamò...
Ma l'è incoeu
che capissi i fadigh,
i rangogn ben sconduu,
mandaa giò in d'on citto bastard
e ostinaa,
per quij ann
che passaven cobbiaa...
Semper biott.
La mattina bonora,
in del sguazz de la nott che sbiaviss,
a bassora,
cont el sô che a quell'ora inlocchiss
dent i stobbi
che spongen d'agost...
Poeu, in del fosch de la sera,
che bonna,
la te dis de casciai dent a moeuj,
per regoeuj
volontaa e pudor
de andà inanz
senza quasi fiadà.
Per restà...semper tì,
a pee biott,
con la pell che diventa coramm
come i pee di tò besti,
e in del stramm
sentiss nò inferior, nè bandii.
E i tò gent,
per "ereditaa",
con la fed e coi bon sentiment,
i pee biott a carpogn t'hann lassaa...
Duu por pee,
che se "a festa vestii"
diventaven per mì forestee,
duu por pee,
che nassuu già indurii,
hinn staa 'l segn d'ona gran nobiltaa,
che mì incoeu...
voeuri mett in cornis,
per tucc quej che poeu i spall
gh'hann voltaa.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
