Paraguay ñe'ê
de Ramón R. Silva
Mario Garcia Siani-pe
Peju, peju,
pejupaite.
Jajora ñane ñe'ê apytî.
Taipoty po pu ñanemba'éva.
Mborayhu ysapýpe.
jahypýi ñane ñe'ê
tahoky,
topu'ã
tojupi
tokakuaa,
topave'ÿ
máramo añete.
Jaháke jaháke jaha.
Néike che irû jaha.
Tohóke.
Toúke.
Tosêke.
Toikéke.
Toike
akói Paraguái ñe'ê: Guarani guarani
guarani guarani,
guarani guarani.
Jaháke jaháke jaha.
Néike jaha lo mitã,
ñañombyatypa,
ñañopytyvõ,
jarohory ñanemba'éva,
jagueraha tavapýre
kuaapy,
purahéi,
temiandu,
tetã jehayhu ha vy'a.
Jaháke jaháke jaha.
Jaha ñamyasai kogapýpe
ñe'ê poty,
ñoha'anga,
ñande reko,
arandu,
purahéí,
mombe'u,
morangu,
akói Paraguái ñe'ê,
Guarani guarani
guarani guarani
guarani guarani.
Jaháke jaháke jaha.
jaha ñamyasãi tetã jehayhu.
Jaháke jaháke jaha.
Jaháke jaháke jaha
Paraguái ñe'ê.
...
|
|
|
|
|
|