Dino Berti
Môrt ala fén di ân Nuvanta, l êra un poêta brèv e presänt int l'antologî di poêta dialetèl curè da F. Panigoni.
Deceduto alla fine degli anni Novanta, era un poeta di valore, presente nell'antologia poetica dialettale curata da F. Panigoni.
Umarâz
Un dåpp-mezdé d autón, ch'l êra vêrs sîra,
pr un vièl ed qui ch'custàggen la zitè,
un ruglàtt ed parsån, cómm int la fîra,
al stèva intåurn a un òmen che, sdrajè,
al parêva durmîr int na banchénna.
"I é quèl da vàdder?" la dmandé una vcénna.
"I dîsen ch'ai é un môrt" l arspundé ón,
un òmen mòr ch'al stèva in pónta ed pî.
A cäl parôl tremändi an s vulté inción,
la vcénna, såul, la gé "Gesó Marî!".
Là par la strè, un òmen l êra môrt
abandunè da tótt, sänza un cunfôrt.
L êra ón d chi òmen ch'vîven cómm Dío vôl,
fté d strâz, con un capèl tótt rått e bsónt,
äl schèrp da militèr pirdêvn äl sôl,
la caparèla sbusanè in pió pónt,
la bèrba lónga, incåulta, äl brèg lighè
con una lâza. Un quèl da fèr pietè.
Atais a ló, par tèra, lé da un lè,
un fagutâz tótt pén dla sô misêria
e un buslòt con un pô d ranc' avanzè...
La zänt d intåuren la dmandèva sêria:
"Chi srèl? Indóvv starèl? Come srèl stè?"
Cumént curiûs, mo prîv d ògni pietè.
Un ragazôl al vlêva andèr in brâz
a sô mèder, par vàdder anca ló,
mo lî: "Vén vî, vá là, l é un umarâz..."
Un umarâz. Pôl dèrs, mo parché pó?
In tótt i môd un òmen tant dsgraziè,
sänza una cà, sänza famajja, dsprè.
Fôrsi una tragêdia sänza nómm
l'à cunsumè cal côr ch'an batrà pió.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
