L âlber e al cazadåur
Un âlber. Un zigànt ch'l arà zänt ân,
col brâz'avêrti a bàvver l'âria, al vänt,
la lûs dal såul... avêrti al firmamänt,
ch'i acójjen tant'anménni ch'n an afân,
zujåusi, ch'i n san gnént dal mèl, dl ingân...
Såtta äl såu brâza i trôvn asîl fidänt
e i fan gufén la nòt, trancuéll. I én tant
sti uslén che ló al prutèz da ògni dân...
L é vgnó al nôv dé. Là só int al râm pió èlt
n uslén cuntänt al canta a våus spieghè...
Luntàn i arspånnd un èter... Un våul, un sèlt...
Epûr ai é quèlc òmen trést, dsgraziè,
ch'an sà livèr d in tèra i ûc' in èlt
che par dèr a un côr cuntänt una stiuptè!
...
|
|
|
|
|
|