Emilio Guicciardi
San Rocch in del bosch
************************
DIMAN ghe sarà i foeugh
in di tabiaa
sui mont
su l'era di cassinn
su la porta di crott
in del coeur di moros
in di gamb di tosann...
DIMAN.
Diman feniss l'estaa
e passa l'acqua ciara
quell'acqua de giazzee.
L'Oratori di Mort
el cicciara
in la Vall.
Coi sò quatter campann
ghe respond su la Costa
«Saan... Gioaann...»
e pussee de vesin
«Saan...Martiin...
Saan...Martiin...»
Che vita longa eterna
stà lì a speccià l'invèrna
settaa giò in sul banchètt
foeu de l'uss
e vardà
giò la...
tutt quij crós
quij ciarin...
«Saan...Martiin...
Saan...Martiin...»
Se desseda in l'ombria
sognorent
de lontan
«Saan...Caassiaan...»
Secchee no la zuccòria
tant San Rocch l'è diman!
L'è diman la giornada
la nott de la caldura...
Anca nun vècc strupiaa
soffègom, saltamento!
La scrissa in d'el scartoss
la loeuva del carlon...
In di ronch in sui praa
se canta a scarpagoss.
E dòbbien el firón
e rampèghen i donn
per impienì la gerla...
E vòlen i folcion
fin sora L'Alp di Merla.
Ma nanca on poo de fiaa
d'aria soliva al Pass.
La giavèra del Sass
la fuma de rabbiada
bianca e lusenta.
E sù Te vèdet? Sora...
(ghe vedi propi pù...)
Sora la cresta, inscima...
come in di temp indree...
in cò del Pass. In Sguìzzera
i òmen ch'hin foeuravia
per tutta ona stagion...
in capp al mond...
Tòrnen
sgagnand pamposs
de sotta al Sol Leôn
incontra ai donn, ai fioeu
ai vècc coi gatt in scoss,
insomenii.
San Rocch...
San Rocch dentr in del Bosch
San Rocch de la Montagna
San Rocch cont el sò can
San Rocch con la cavagna
che porta la rosada
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
