Franca Brambilla
I perla fals
******************
"Chi mai stette in pace
ora ha trovato pace"
Vorariss che sti paròll
vegnissen scritt
su la mia preja
al cimiteri.
Ogni dì
sta mania
de vess, de fà:
ògni sira
el torment,
el cruzzi
d'ona perla falsa
infilada
in la collana de la vita.
De semper
la bòria d'avè capii on quajcòss
de sto viv...
De semper
el sentor
de nò faghela.
I ricòrd striaa
di moment pussee bej
spanteghen
'me ona polver dorada
su i mè penser.
Ma se foo tant
de vorè fai viv
cont i paròll,
me par de sperlà el Dòmm a scur
al ciâr d'on solfanell.
Ma quand,
cont i man che trèma,
rugatti
in quell remissell ingarbiaa
che l'è el viv,
per cavann-foeura
on moment de pâs,
e troeuvi on granell de féd
per créd anmò in la gent,
e troeuvi on barlumm d'amor
per voregh ben anmò a la gent,
e troeuvi che se po' sperà
anmò in la gent,
ecco,
hinn quej i moment pussee bej,
anca se i man tremen anmò,
me par allora,
de vess ona stella che brilla,
anca se la lus
l'è la toa,
Signor,
che sacrosanta fadiga credet!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
