Gabriel Gonzalo Llanquinao Llanquinao
GÜRÜ EGU ZIJO
Miyawürkey ti zijo inaltu mawiza mew
Feyti zijo ülkantuyawürkey:
“Pimpim pimpim, pimpimka pim pim, pim pim anay”
Pirkey ñi ülkantun.
Fey ga ruparkey ti gürü, ajkütulewerkey ti zijo ñi ülkantun
Femechi fey, feypirkefi:
“mari mari zijo, müna kümelkay ta mi ülkantun
Inche kay chumechi chi femechi ülkantuafun” pirkey ti gürü.
Azkintujeeyu, alürkey ta mi wün,
femechi ta pepi ülkantulaafuymi ka, pirkeeyu ti zijo,
welu ñüzüfgele ta ülkantuafuymi ta ti, pigerki chi gürü
May feman ka, ñüzüflelaen ta ñi wün, pirkey chi gürü.
Fey ga ti zijo ñüzüfelürkefi ñi wün ti gürü:
Amulelu ñi ñüzüfelgen, wirarürkey ti gürü:
aay, aaay pirkey ti gürü, kuxantulu
Femechi ka azüm azümtuaymi pigerkey chi gürü,
Fey wünelu mu epe azümürkefuy,
fey ka püchi ñüzüfelgerkey
Fey wüla ga küme azümürkey ti gürü.
Femechi fey amulürkey ñi ülkantun:
“Pimpim pimpim, pimpimka pim pim, pim pim anay”
fey ga kiñen antü miyawlu ti gürü inaltu mawiza
ülkantuyawürkey, ayiwkülerkey ti gürü,
welu ti zijo newe ayirkelay,
fey ti gürü zoy kümelkaturkey ñi ülkantun
fey mew, feypirkey ti zijo:
“kaji müten, rupale jükalkantuafiñ” pirkey ti zijo
fey ga rupalelu ga ti gürü inaltu mawiza, ülkantulen
fey ti zijo jopalerkey, fey wipipipi pirumerkey ti zijo,
fey ga ti gürü, wag piturkey
femechi fey ti gürü kom gülaturkey ñi wün
femechi fey fentepurkey ñi ülkantun chi gürü
Fentepuy
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
