Pier Luigi Amietta
La gioia che si sente
*********************
Se gh'è on moment, de sera o de mattina.
che te guardet el sô quand el va giò,
o el sponta là, dedree de la collina
e 'l se sferla de sguinc in sul comò,
te penset ai tò dì; quei ch'hinn passaa
e quei che adess te resten ancamò...
Quel che te podet dì e te podet fà:
scriv ancamò on quai liber, rampegà
sora ona quai montagna, visità
on quai paes lontan; o restà a cà,
settaa su ona cadrega o sora el tò
sofà a fà deslenguà ona caramella,
sentì 'na sinfonia (o magari do)...
L'è no per lamentass o fa querella:
gh'è semper on quaicossa in la TIVI':
on concert (e la musica l'è bella),
e 'na quai volta al Super ghe voo mì...
Ma, sacranon, disemmela, 'sta vita
a mì la me par loffia, dì per dì,
Ven voeuja de sfojà la margarita
per domandagh "sto chi o sto minga chì?
Me guardi el mus ch'el ven foeura del specc,
vedi on bagaj (o la vista me inganna?),
poeu vedi on vegg, on giovin e anmò on vegg
(i ricord che me fann la gibigianna)...
Ma quel bagaj d'on dì l'è inscì lontan,
e 'l vegg l'è chì, tutt i or e tutt i dì...
E come in sogn, me incanti lì a pensà,
fin quand vedi ancamò spontà on bagai
ch'el me someja...E adess? Sont anmò mì?...
Eh no, quest chì l'è viv, l'è minga on sogn,
el gh'ha i tressitt e on faccin de bombas:
e poeu el gh'ha in man soo no che catanai
che me le struscia fina sotta al nas....
"Ti piace nonno?". "Bello, me lo dai?".
"...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
