Pino Mazzola
La lusiroeula
**************
-«Mì gh'hoo creduu
a l'amor
'na volta solla
e la mia vitta
l'hoo brusada via
insemma cont i sogn de gioventù.
Adess però nissun
me incanta pù!
Chi fa l'amor con mì
no'l gh'ha de mè
che on sbrindol
del mè corp indifferent
compagn d'on animal
che in d'on moment
el va in surbuj
ma senza sentiment!»
...Di volt,
quand ghe tornaven
in la ment
i regord disperaa
del sò passaa,
Lee la cantava inscì
per el bisogn
de sfogà el sentiment
pussee rabbiós
contra el destin,
la gent...
contra de Lee
contenta, on temp,
de batt el marciapee.
Dopo la furugada
di vint'ann
a pocch a pocch
gh'eren passaa i scalmann
lassand el sègn de dent
pesg che de foeura,
in d'on marsciumm
ch'el rodegava in fond
mes'ciaa cont el torment
de la pagura.
- «Chi fa l'amor con mì...» L'ultima sira
quella canzon
ghe l'hann strozzada
in gora...
'Na cortellada...on altra...
e on altra anmò...
- «On sbrindol
del mè corp indifferent...» L'è scarligada giò
compagn d'on strasc
cont on lament
smorzaa
in d'on sbocch de sangu...
- «Compagn d'on animal
che in d'on moment...» Oeucc sbarattaa
de l'ultima pagura
sperduu in del voeuj
a domandà on «perchè?»...
- «Mì gh'hoo creduu
a l'amor
'na volta solla...» L'è morta inscì!
Sbiottada in d'on canton...
- «Adèss però nissun
me incanta pù» E l'è volada via
cont 'sta illusion!
Gh'è on altra lusiroeula
in sul canton,
e par de sentì in l'aria
anmò quella canzon...
- «...E la mia vitta
l'hoo brusada via...»
La vitta!... On garbuj
de miserii e de dolor!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
