Francesca Giussano Ornago
La mia strada
**************************
E se me volti indree
vedi ona strada
che la finiss in nient.
Regord a bindolera...
... Primm pass, spinn, sass
On magonin de pocch
ch'el volava su in ciel,
'na matina d'inverno,
insèma al ballon ross
sguizzaa foeura, col temp,
di mè man de tosetta.
On saccoccin pien de marron rostii.
...Ragner e smagg de luna
On mazzettin de vioeul
sul banch de scola,
timid sgrisor d'amor.
"Rosae, rosarum, rosis...
Profumaven allora,
sbocciaa coi primm basitt
sul tripilà di laber 'serb,
de fambros.
... Polver e ragg de sô
Paroll sottvos. E la lus
d'on miracol d'amor;
el fagottell di butt
in la cuna de pizz rosa e celest.
On cavallin de scocca
e ona pigotta bionda
con la testa rotta.
... Vent, pioeva, ombrii
Port dervii, port saraa
truscià, sudà e rid,
rid 'na quaj volta;
streng la man d'on amis,
on biccer de quell bon...
On tocch de viagg insèma
in allegria.
... Foeuj cbe croda, sbasii
In su la via del temp
ritratt, sorris perduu.
E me guardi in del coeur,
me leggi in l'anima
e troeuvi dent el ben d'ona poesia
...Stell sconduu sott ai nivol
E catti sù i mè sogn
e i mè speranz
per tirà innanz
fina a l'ultima curva.
Requiarann i mè pass,
quand finirà la strada,
de là de la corona dora
del sô.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
