Corradino Cima
Musica
***************
Ona quaj vòlta cert v’è capitaa,
passand da on paesòttel de la Brianza,
de fermass lì de colp, quasi incantaa
da l’armonia di tint, de la fragranza
di gelsomitt, di glicin intrecciaa,
che scarlighen giò giò, come ona franza,
a ciuff, a grapp, da on tecc, o da on murell,
da i rizz e i ghirigori d’on cancell.
E lì, travers quj rizz, quj ghirigori,
contornaa de piant tutt pien de usej,
vedè ona villa, voeuja, on ver mortòri,
coi gelosii saraa, con via i listej,
e, come se cuntassen sù di stori,
in la fontana ferma, duu cannej
che a gotta, a gotta, a gotta... ticch, ti, ti...
Ve spruzzen dò ninfej ch’hinn ‘dree a fiorì.
E in del poggià la testa a quell cancell
Dove la ruggin farinosa e freggia
Le smangia nòtt e dì pian pian, bell bell,
senti ona vos a carezzav l’oreggia
sul fà d’ona canzon, d’on ritornell
che cognossee, d’ona storiella veggia
che ve commoeuv, che tocca el sentiment,
che ninna el coeur come on popò indorment.
E ve par de vedè cont i oeucc saraa
E coi caprizzi de la fantasia
Che ve fann cred i sògn per realtaa,
derviss de chì e de là ona gelosia,
sparì quj boeucc, quj trav tutt cariolaa,
e cont on bell piumagg che sbilza via,
confondes el "piss piss" de la fontana,
cont un «Chopin» sul piano, a la lontana...
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
