Attilio Boggiali
Pussee de mila violitt
**********************
Hoo dervii la finestra del poggioeu
per scoltà, in sui cinqu or de sera,
el gran concert
de tutti i passaritt del mè giardin.
Me che zabètt, tutti quji passaritt
che cippen 'me dannaa
in l'aria ciara,
cont el primm soo sbiavii,
con l'acqua, el vent,
la nev gelada
o el gris de la scighera,
in del nass generos
d'ogni mattina
o in del morì del dì
prima de sera.
El parariss on frecass,
ma l'è nò vera.
L'è ona musica,
on orchestra,
on'armonia,
fada de mila violitt,
miss tucc insema.
In del scoltaj
par pù de vess al mond,
sto mond tutt pien de rògn
e de penser,
ma l'è quajcoss de grand,
de pussee bell,
de tant meraviglios,
ch'el mett domà ona voeuja
de sconfondes
in mezz al verd di piant,
al fresch di foeuj,
e a rampegass sù in alt
semper pussee.
O incantesim, d'on'ora desligada
de tutti quij sò gropp
taccaa a la terra:
tanta musica in l'aria
e in del mè coeur.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
