EL ARCIPRESTE DE HITA
GOZOS DE SANTA MARÍA (2)
***************************
Virgen, del Çielo reína,
e del mundo melezina,
quiérasme oír,
que de tus gozos
escriva yo prosa digna
por te servir.
Dezirte he tu alegría
rogándote toda vía,
yo pecador,
que a la grand culpa mía
non pares mientes, María,
mas al loor.
Tú siete gozos oviste:
el primero, quando resçebiste
Salutaçión
del ángel, quando oíste
¡Ave, María; conçebiste
Dios, salvaçión.
El segundo fue conplido
quando fue de ti nasçido
e sin dolor;
de los ángeles servido,
fue luego conosçido
por Salvador.
Fue el tu gozo terçero
quando vino el luzero
a demostrar
el camino verdadero
a los reyes, conpañero
fue en guiar.
Fue tu quarta alegría
quando te dixo, María,
el Grabïel
que el tu fijo vevía
e por señal te dezía
que viera a él.
El quinto fue de grand dulçor:
quando al tu fijo Señor
viste sobir
al çielo, a su Padre Mayor,
e tú fincaste con amor
de a él ir.
Non es el sesto de olvidar:
los discípulos vino alunbrar
con espanto;
tú estavas en ese lugar,
del çielo viste ý entrar
Spíritu Santo.
Este septeno non ha par:
quando por ti quiso enbïar
Dios tu padre,
al çielo te fizo pujar,
con él te fizo assentar
como a Madre.
Señora, óy al pecador,
que tu fijo, el Salvador,
por nós diçió
del çielo, en ti morador;
el que pariste, blanca flor,
por nós murió.
Pecadores non aborrescas,
pues por ellos ser merescas
Madre de Dios;
ant'él connusco parescas,
nuestras almas le ofrescas,
ruégal por nós.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
