Carletto Pierotti
Poesie
**********************
PRESENTAZION
Dent in d'on còregh
de pattei e famm
via Alciato
la m'ha faa de balia succia.
Adèss gh'hoo i mè bei ann,
ma el rusgen di ringher
ch'el m'ha marcaa,
l'è on segn
che podi minga cancellà.
Spegasc martorad
tant per sfogamm
per viv i sògn
che hoo tiraa adree de fioeu
insema a la miseria
di mè strasc:
sògn che soo nò
se varen anmò incoeu...
Però quand scrivi
gh'el domandi al coeur,
a on coeur che l'è nò gròss,
l'è apèna on pugn,
on coeur
faa da ona mamma portinara
on coeur
che cambiarissi con nissun!
RICORD DE LA VALASSINA
Gesioeula, cont i copp color vin bon
desbirolaa, rianaa de teppa grima,
cocciada sora on dòss, dove i moron,
fann ombra a quell sentee che riva in scima:
son ritomaa a trovatt.
Te see anmò quella:
cont la toa passadora color crèma,
frusta e slisada 'me la gradisella
che, nanca a rebugalla, la sta insèma...
Con quell òrghen mezz bols in cantoria,
col busseree tobis che le sonava,
coi cames strafojent in sacrestia
e i mantellinn tutt smont, color biedrava...
El Sô ch'el sferla dent in diagonal,
l'inlumina i ragner taccaa a l' altar:
la busiroeula del confessional
la sberlusiss 'me 'l specc d'on armoar...
El Crocefiss che pend da la navada,
el doeuggia i banch de sòtta, cajrolent,
el benediss la testa sperlusciada
de duu pinella e mì...mezz magonent!
da: SCIROEU de MILAN
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
