I ténp antîg
L é chèld... D andèr a lèt pròpi an m la sént;
qué da par mé, a päns col mî zarvèl
cum fèvn i nûstr antîg... ch'i fèvn äl schèl
sänza asensåur e sänza tant strumént
ch's à dè al prugrès. Epûr i êren cuntént...
sänza la râdio, l'àuto e ògni èter quèl
ch'avän nó adès, ch'andän fén int äl strèl
e ormâi a n i fän pió chès, cómm s'al fóss gnént...
Däl distraziån, puvrétt, n avêven brîsa;
i andèven dala spåusa tótti äl nòt
tótt rispetûs ed quall ch'la dîs la cîsa...
o tótt al pió, quand i s sintêven trésst,
i andèvn a dèr ai tûrc socuanti bòt
digànd d vlair liberèr la tånba ed Crésst!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
