Odette Righi
Presidentassa par tant ân dal grópp culturèl "L Archiginèsi", autrîz ed pió d un lîber såura al bulgnais, l'à publichè una racôlta ed poesî ciamè "Un dé ch'al pèr ajîr".
Presidentessa per tanti anni del gruppo culturale "L Archiginèsi", autrice di vari libri sul bolognese, ha pubblicato una racolta di poesie intitolata "Un dé ch'al pèr ajîr".
Am parêva...
Un dé pén d såul, un dé ch'al pèr ajîr
quand la speranza in un månnd pió bèl
carsêva såtta a un zîl trapónt ed strèl,
am parêva d avair un quèl da dîr...
Sé, am parêva pròpi che i pinsîr
ch'scupièvn in tèsta cómm in un vulcàn,
fóssen pinsîr spezièl ch'i féssen bän
pr ògni tribulaziån, pr ògni padîr.
Sicûra ai êra d avair quèl da dîr
con la fôrza e l argói dla zoventó,
ed qualla ch'an avêva mâi gudó
na sóppa chèlda, sänza mâi finîr
ed guardèr ala lónna a ûc' avêrt,
ch'la strichèva l uciàtt culåur d arzänt
a chi n avêva avó pès un mumänt
tant col nóvvl inbrujè, che col zîl dscuêrt.
Avêva quèl da dîr e pó a l dscurdé
fra i tant pinsîr ch'frulénn int al zarvèl
tra äl dmand difézzil cómm un indvinèl,
paisi cme una masaggna däntr ed mé.
Pó la fadîga granda, al lavurîr,
la vójja ed ròba dåulza e d inparèr,
capîr, bàvver i dé e respirèr...
Però am pèr sänper d avair quèl da dîr
cómm in cal dé pén d såul, ch'al pèr ajîr...
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
