Mario Scurati
Discors in vedrina
******************
Denanz a 'na vedrina a fà de specc
on ciocch tradii malfermo sui gambett
el ciòcca contra 'l mond, ghe l'ha con tucc,
d'infilada comencia on discorsett:
Amor, che on bell dì t'hee menaa i tòll
per colpa d'on gandolla ballabiòtt
perchè mì s'eri on ciolla alt e mòll
adess son dislippaa, gh'hoo pù nagott!
El sbircia in la vedrina la grisella,
el varda el nas, el sfiora el sò barboss:
pensà che s'eri anmì on bell biscella
taccaven lit i donn, semper addoss!
On arimòrta, appena d'on moment,
domà per ciappà fiaa e bagnà el gòss
e poeu...de bott el cambia argoment
ghe l'ha cont i politich tucc balòss!
El tira in ball Comun e Parlament
e come 'l solit el vin el parla s'cett:
hinn di gran lader, voeuja de fà nient
e bon de cicciarà e fà dispett!
Cont i ligera che venden "cocaina",
fioeu e tosann je fann diventà matt,
l'è nò 'me dent per dent ciappà gaina,
quand te see faa te see on fregon di piatt.
Poeu i "magnaccia" parent di rocchettee,
prima promess poeu bòtt e privazion,
a ruzen tosanett sui marciapee,
vita de can, va tutt a tomborlon!
Ma quanta verità vegnuda a galla
in d'on discors tra on ciocch e 'na vedrina
"vino veritas" e l'è nò ona balla
ma questa verità l'è genuina.
Anmò 'n'oggiada al scior denaz a lù,
ma la vedrina l'è domà 'na porta,
la se derva e ch'el scior là 'l gh'è pù,
dal stremizzi ghe ven la faccia smorta.
E adess, in mezz a on via vai de gent
el manda giò on gottin per tirass sù,
quell che gh'è ...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
