Emilio Guicciardi
Scighéra in Piazza del Domm
****************************
«Fa ninin popoo de cuna...
Va giò el sol...e nass la luna...»
La vola, la scighéra.
Tutt bombàs.
La vola per el ciel
la quatta el Dòmm
la sghimbia in di porton
la se strusa sui prèi
la va e la ven
la se mazzàra.
Gh'è di angiolitt
forsi che piang?
Ma che.
Domà pivion
rinfignaa
sul coo di Sant
che dorma
di guli
di demòni
che dragonna
che ghigna
Tutt bombàs.
Ffffffffffff...
Ffffffffffff...
Bocc de lampion
(tazzin de latt
che fuma)
La gent
la fiada fumm.
E mì snasi.
Odor
de castègn rostii
de piri cotti!
chi sa indoe
chi sa quand.
Odor
de marscida
bombàs a moeuj
gabbad
risera
fumeri che ven su
e tenebror
Uuuuh uuuuh uuuuh!
La ven la veen
la stria...
'è quella...
L'è vuna
che a st'ora...
«Fa ninin...
popooooo...»
Tì, no
Tì, no.
La vola per el ciel...
«e nass la luna».
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
