Elicura Chihuailaf
*****************
FEMGECHI XEKALEY ÑI ÜLKANTUN FAW
(DE SUEÑOS AZULES Y CONXASUEÑOS)
*****************
TAMI XEMOAM TA KÜPAN, PIENEW TI FOYE
Tami xemoam ta küpan, pienew
ti Foye
Küpage ka gümituge ñi tapül, ñi
fün pipiyeenew
Wajkapüle küpay mi kümeke zomo
Machi ñi kümeke wenxu Machi
meli xokiñ Mapu mew
meli xokiñ ko mew
gijanzuguayu, pipiyeenew ñi
pu newen
mi pu füw kechi kalül mew, mi
pu foro mew, mi mojfüñ mew
Kam rupa elimi am taiñ pu che?
Püraman tañi jejipun, pifiñ
Ay, ñi pu rakizwam wüzaygu
ñi lewfümu ñi piwke:
Feyta nomekintun chi Elügkura,
iñche mu, pimi
Oo! Genechen, küpatulen tami
kochü kürüf, tami newen,
tami neyen
Feyta ta ülkantu fegeay, pimi
wülmeketew Kajfükawej zugun
Wenu Mapu mu kütu puway
ñi Pewma mu tati
kalül zugulefi tati pu kayñe
ñi werken
Zuguli ta ajküanew ñi kimün
anümka lawen mew ka pu rayen mu
Femgechi feypimi
Iñche rupa goymafun ñi pu
Füchakecheyem ñi gülam
fey mu fewla kuxankülen
Ñi rakizwam wüza xipaygün
ñi Lewfülen Piwke mu
Azkintuen, petu pewman fey mu
petu püran tami tapül mew
Feyti puliwen KajfüTxayxayko
güforümapaenew ñi müjfüwün
ñi ko mew
Püran, pürayu, welu tügüm enew
chajwa ñi ñochi zugun
Feyka xekan ti nümün xipachi
mawizantu mu
Ka rumen mu purun. Kisu mu
pülxüley ñi newen
Kümeke Pelontun ka kümeke Pewma
tuway manieyu
Güman may fey mu, güman
rofülnienew ñi Foye ñi püjü.
...
|
|
|
|
|
|