Jean-Henri FABRE
LOU GRIHOUN
.o0o.
Cri-cri, cri-cri, fai lou Grihoun
Aqui dessouto
Dins uno mouto ;
Cri-cri, cri-cri, fai lou Grihoun,
Dins la mato de bregaloun.
Sus lou lindau de sa cabano,
Ounte jamai s'es atuba calèu,
Pichot Grihet friso si bano,
Lou vèntre au fres e l'esquino au soulèu,
Dóu negrun de sa caumo sourno,
Es remounta sus lou cop de miejour ;
Es remounta de sa cafóurno
E pren sa part di joio dóu plen jour.
Vaqui perqué sa grosso tèsto
Banejo tant. Grihet, tout esmoungu,
Pèr celebra la grando fèsto,
Em'un vióuloun sus sa porto es vengu.
Qu'es bèu lou soulèu que dardaio,
Se dis : qu'es bon lou rai de sa calour,
Rai que m'arrivo entre li paio
Dóu bregaloun tout azuren de flour !
O bèu soulèu, tu siés la vido
De tout : tavan, luseto et mousquihoun !
Escouto un pau, glòri esplendido,
En toun ounour l'èr d'un paure Grihoun.
Cri-cri, cri-cri, fai lou Grihoun
Aqui dessouto
Dins uno mouto ;
Cri-cri, cri-cri, fai lou Grihoun
Dins la mato de bregaloun.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
