Carlo Porta
La Ninetta del Verzee
*°*°*°*°*°*°*°*°*°*°*°*°*°*
Bravo el mè Baldissar! bravo el mè nan!
l'eva poeù vora de vegni a trovamm...
T'el seet mattascion porch de maneman
l'è on mes che no te vegnet a ciollam?
Ah Cristo! Cristo! com'hin frecc sti man!
Bell bell... speccia on freguj... te voeu geramm,
bolgirossa! che giazz! aja i mee tett!
che bell cojon, sont minga on scoldalett.
Pover tett nèe?... te sentet com'hin froll?
Ma, gh'hoo avuu ona passion, varda in sti dì
che l'è stada, per brio! el mè tracoll.
L'è quaj cossa ancamò se sont inscì.
Ven scià...settet giò on poo...già l'è anmò moll,
e poeù coss'eet de fa? l'è venerdì
gh'è minga d'opra: descorrem on poo,
chè subet che l'è all'orden te la doo.
Varda el me Baldissar se se pò dà
on mond pussee carogna, on mond pù infamm!
Te se regordet d'avemm vist per cà
quell gioven magher, longh come on salamm,
ch'el me vegneva a toeù de andà a ballà?
Che di voeult te l'ee vist a peccenamm?
Ben: sent adess, sto roffianon strozzaa
che tir fioeul d'ona negra el m'ha giugaa.
Prima de tutt t'ee de savè che fina
de vint agn fa, quand sont restada indree
della povera mamm, la mia medina,
che adess, jesuss! l'è al Gentilin anca lee,
per no invodamm a santa Catarina,
o lassamm andà in cà d'on quaj mestee,
la m'ha tiraa in cà sova e tegnuu inguala
d'ona soa tosa vera e naturala.
Sta mia medina l'eva ona tetton
matta, allegra quell mai che se pò dà:
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
