Paola Donzelli Barris
Al giardin pubblich
*********************
In d'ona carrozzetta de gran lusso
gh'è on baciocchin ch'el dorma in mezz ai pizz.
Settada lì vesin 'na balia succia,
vestida press a pocch 'me on arlecchin,
la dèsfa on cert'ascia ingarbujada
e on bell soldaa el ghe fa de bicocchin.
Pussee lontan, intorn'a la fontana,
gh'è on ròsc de bagaìtt che ten el fiaa
denanz a on motorin che fila dritt.
Alter che el sandolin o la barchetta
che se stravacchen al primm boff de vent,
anca ben a tiraj con la cordetta!
Scarlighen via sui pattin 'me saett
fioeu dai ses ai quindes ann sonnaa;
intanta bej tosann cont el gingella
strengiuu sòtta brazzett, i man in man,
in certi cantonscei foeura de tir
se varden in di oeucc e parlen pian.
Lavora l'elefant per quatter pòmm;
ruggisen i bestion de la foresta;
fann la roeuda i pavon sora l'erbetta
e, là taccaa a la gabbia di scimmiett,
gh'è ona ressa de gent che ciappa gust
a buttagh castègn pest e spagnolett.
El temp, insòmma, el corr in di giardin
e ognivun, a sò moeud, el se la gòd;
chi, vardandes in gir, pensa e riflett;
chi pessega de matt a fà calzetta,
chi sperla ben polit tucc quij che passa
e chi fa on visorin su la banchetta.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
