Paola Donzelli Barris
La fontana del Castell
**********************
Veduda de lontan, l'è tant 'me on vèll,
bianch e sottil 'me quell d'ona sposina,
denanz la pòrta granda del Castell;
o pur...anca ona nebbia fina, fina,
che, inveci de fenì in quell ciel lontan,
la sta pòcch sù de terra maneman.
Ma, veduda vesin, l'è on altr'affari:
milla sprizz d'acqua sbilzen dal desòtta,
se slanzen con gran forza sù per ari,
lì s'incontren, s'incrosen, fan la lòtta,
poeu, sfregujaa in milion de gott-gottin,
fann, borland in la vasca, on laghettin.
E quand in certi or de la giornada
el soo el giuga in l'acqua in moviment,
se resta con la bocca spalancada
denanz a on spettacol sorprendent:
se trasformen i gott come d'incant
in rubin, in topazi, in bei brillant.
Seri al Castell, antigh 'me la befana,
con certi piant, tutt rosa i primavera,
ghe fann de bell scenari a la fontana
dove cippen uselitt mattina e sera.
Bastarìa minga a sconfond sto cantonscell
chì che dis che a Milan...gh'è nient de bell?
.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
