Roberto Di Roberto
L'anema mia
L'ANEMA MIA
Ce si' turnata, ncopp' 'a stessa strata
sulagna e chiena d'albere spugliate,
addò sti core nuoste, cammenanno
facevano unu core.
Mo ce vai sola, cu na sciarpa nera,
pe segno 'e lutto 'e chi tenive caro,
e vai distratta, fissa cu 'o penziero
che vola assai luntano.
Chi t'era caro nun t' è cchiù vicino.
Te firme e, ncopp' a nu murillo, appuoie
'o libro e llegge tutt' 'e ppoesie
ca io screvevo a te.
Cu ll'uocchie 'e chianto guarde verso 'o cielo,
comme si me vedisse. E, 'a miez' 'e nnuvole,
songo i' che guardo st'uocchie appassiunate
ca chiagnono pe me.
Chesti llacreme asciute 'a dint' 'o core
me diceno ca si' rimasta sola.
E invece no, nun t'hè 'a sentì mai sola:
l'anema mia sta sempe affianco a te
...
|
|
|
|
|
|