In cunfidänza
Che fadîga, ragâz ch'l'é la vétta!
Un dé stôrta, un dé pèra, un dé drétta...
Tra sperànz e tra méll ilusiån,
spass brusànd quèlca bôna ucasiån.
L'é una dûra ed etêrna partîda,
l'é una stòria e la t pâsa stra l dîda,
l'é un regésster ch'at tåcca ed rinpîr,
l'é una gåzza ch'la t cåulma al bichîr.
I é chi prôva a sumnèr la furtónna
rezitànd dåu uraziån ala lónna,
ma la rôda la gîra s'ai pèr
e t î sänper custràtt a paghèr.
Al rimêdi pió sêri e pió giósst
L é ciapèrla, la vétta, con gósst!
L'é una chèrta ch'avän da zughèr,
l'é un cafà, un pô dåulz e un pô amèr.
E se la vétta ògni tant l'é un pô bûra
l'é pûr sänpr una bèla aventûra,
e a v al dégg pròpri qué in cunfidänza:
- Méi avairla, piotòst che fèr sänza! -
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
