Caterina Sangalli Bianchi
Cancell rusgen
**************
Dervégh el cadenazz a sto cancell
che prima l'era vèrt a tutt i gent
e lor, vegneven dent,
per la bontaa di mè.
Dervémel sto cancell irrusgenii
col cadenazz che va nè innanz nè indree...
Son chì de foeura, in pee,
voeuj vegnì dent an'mì!
Gh'è pù nissun?... Ma l'è mai proppi vera?
Ma mì, son chì al cancell a guardà dent
e voeuri savè nient
de quell che mi soo nò.
V'el disi an'mò! Dervémel sto cancell,
tiree con tanta forza el cadenazz,
l'è nò rusgen dal sguazz,
ma per el temp ch'è andaa...
Sì...Sì...Hoo capii... Gh'è proppi pù nissun:
Son nò sarada foeura domà mi.
Però, lassém stà chì,
ingenoggiada ai pee del mè cancell!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
