Pier Luigi Amietta
Italiana in Algeri
******************
Rossini, l'Ouverture...
Violin che ne pizzighen
quater not, 'me stremii,
e poeu de bott
l'orchestra che la s'cioppa:
ona lusnada, on tron
e citto...Ona coronna
de silenzi incantaa
che l'oboe el ricama...
On ghirigori arios
ch'el gira, el gira, el va...
El par ch'el sta, intant
che l'ottavin in ponta
de pè el cicciara
su quella nota,
l'ultima, leggera, abandonnada
da l'oboe in l'aria, dolza
'me 'na carezza dolza...
Poeu violoncell che rognen,
i bassi che se gionten
e in fond comenza i piatt
a pizzigà..."cin, cin..."
dedree de la grancassa...
Se quietten sul clarin
ch'el se s'ciariss la vos
e, sol, el canta,
el rampega, el va su...
E vun e duu e trii:
l'orchestra
la par on poo inlocchida
poeu la se slarga, la cress,
la se spantega...
Signor, come l'è forta...
On ultim bott e in l'aria
tremma la toa emozion: pù nient...
...Fenida. L'è fenida,
la Musica, ma par
fin de sentilla anmò comenza i piatt
là, che la vola,
che la traversa el mond
passand per el tò coeur.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
