Pier Luigi Amietta
La fin de la canzon
*******************
Te guardavi in di oeucc, quej ultim dì.
Per tì
Numm serom pù el tò fioeu
Pù la toa miée
Serom di foeuj crodaa
che volaven intorna ai tò pensér.
Serom ricòrd...Seri el ricòrd del sô,
su la rizzada - Cava Musòcch, dove andavom in bici i dì de festa
tì a mett a bagn i pee, mì a fà di fòpp
con la paletta...
E te me davet i tò insegnament:
(minga de liber, nò...): te me mostravet
come se fa a tajà el salamm de sbièss
o pizzà 'l foeugh senza fa tròpp de fumm.
E pussée innanz, quand seri pù bagaj,
come se fa a molà sora el coramm
el resô, 'dasi 'dasi, innanz e indree...
Te disevet pù nient, ma in de la ment
gh'era la mamma: gent, 'me la rideva
quand ti te comparivet, d'improvvìs
(l'è semper in cusina), cont in coo
el sò cappell, quel del sò dì de sposa!
Adess son chì, già vègg, con l'inventari
di mè ricòrd, e voraria domà
che di bei dì che semm staa tucc insemma
i mè fioeu ghe n'avessen la metà
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
