Giovanni Barrella
In memoria de Giovann Bertacch
*******************************
Quand per la vall del Mera
tacca a cantà el fringuell,
e in l'aria, a primavera,
se sent quajcòss de bell...
Quand, cont on bell tramont
el sô el va a cà a dormì,
lassand su l'orizzont
tutt l'òr del sò mezzdì...
Quand a ona finestretta,
sponta la sira on lumm
che s'ciara ona casetta
dove ghe fumma on fumm...
E vann a cà i pastor
coi pegor e al'ovil...
e sonna dolz i or
lontan, a on campanil...
Quand l'usellin, sul nîd
col sò cipp, cipp, el ciamma
quajdun che a quell'invid
el corr de ramma, in ramma
col vermisoeu imbeccaa
pien d'ansia, pien d'amor...
E canta i grì, e sui praa
smaltaa, tra el verd de fior,
passa siccome on brivid
che tutta l'erba el sbassa
scimand sui fior bell morbid,
come ona man che passa
dolza dent i cavei...
Allora la mia ment
col sô, la lunna, i stej,
col grì, col cipp, col vent,
cont tutta la bellezza
di fior e di farfall,
la pensa, con tristezza
a chì ha cantaa 'sta vall.
La pensa con tristezza
a l'òmm che ormai el gh'è pù
e con gran tenerezza
la vola fin la sù.
La vola sù a Ciavenna
la cerca el cimiteri
dove in la pâs serenna
lontan dai tribuleri
riposa quell Poetta
che l'ha maj faa del mâl
on coeur, 'na ment eletta,
'na gloria nazional
e la se posa arent
a l'urna del Pancera,
la resta lì on moment
in atto de preghiera
davanti a quell sant'omm
la e inginoggia attach,
e la sospira on nòmm
quell de Giovann Bertacch!
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
