CIARDULLO (Michele De Marco)
NNA SERENATA...
Nna serenata, chilla serenata
chi sai tu, chi sacc'io, sempre te cantu...
La luna, ianca, s'e' mpernata
mienzu a lu cielu, e ti lu fa nnu ncantu...
La iumarella abbasciu, guala guala,
ruccula queta queta e chianu chianu...
Nnu riscignuolu canta a la sepala
e n'autru lle rispunna chiu' luntanu...
Cum'e' bella stasira sta campagna,
cchi barsamu, Mari', cchi pumpusia!...
Cchi ntinni a sta chitarra chi accumpagna
sta serenata chi cantu ppe tia...
Tu duormi ntra stu liettu ch'e' fatatu,
pecchi' cce duormi tu, bellizza mia;
e ntra lu suonnu sienti appassionatu
jire lu nume tue: << Maria, Maria >>...
E riesti ppe nna picca, ntantaviglia,
e nun te para no ch'io cantu fore;
ma, ncantesimu nuovu e meraviglia,
para ca si ccu mie core ntra core...
Pue sc-canti, te risbigli, sienti, riri,
e abbazi sutt'a tie lu cusciniellu;
nun iati ppe me sentere, suspiri,
e 'ntra li labbra dici << Povariellu >>!...
Povariellu... Lu sai ca nnu pensieru,
unu surtantu rota ntra ssa capu...
Tu sula me capisci ppe daveru,
tu de le pene mie nun te fa' gapu...
Quannu, bellizza mia, quannu, rispunna
trase la pace ntra ssu core mio?
Iamu sbattuti sempre cumu l'unna,
nun riposamu mai nne' tu nne' io...
Me pare de te sentere: << Ha 'raggiune >>...
dici, e sienti le lacrime saglire.
Fatte curaggiu, e l'urtimu scalune:
ha de finire, bella, ha de finire!...
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
