Ada Lauzi
La gh'ha duu ann
*-*-*-*-*-*-*-*-*
Bell'è passaa duu ann e 'l par ier
che l'è nassuda, car el mè foin,
duu chili e mezz de robba, tutt butter,
piena de famm e ingórda 'me on buscin.
Dess la sfarfoja su di bei paròll,
la va coi sò pescitt, la tocca tutt,
e come la fa in pressa a menà i toll
se la capiss che, in gir, tira de brutt.
Oeucc ancamò innocent e inscì baloss,
'na magiostra madura, quell bocchin
che quand le derva ghe semm tucc adòss.
"Nònna!" la vosa e la me corr vesin,
la tegni stretta e ghe borbòtti adasi:
"Cress, se te voeuret cress, ma pian pianin."
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
