EL PAN
Pan, fruto santo sen de mama
che nutrisse el bambin, quanta fadiga
l'omo ga fato e quanta vita grama
el ga patìo per rancurar 'na spiga!
Pan, tanto el sior ch'el pòvaro te brama,
ma per averte gh'è chi pianze e ziga;
sia maledeto quel che no' te ama,
sia benedeto chi per ti sfadiga!
Pan, per la tera e 'l sol che te maura
e per le strussie de la pora zente
che strassina per ti 'na vita dura,
fa che in sto poro mondo mal spartìo
no' ghe sia chi ga tuto e chi ga gnente:
fa che l'Amor sia sempre el nostro Dio!
...
|
|
|
|
|
|