Luigi Medici
L'acqua nostrana
****************
Canti domà i nost fiumm (quei de Milan
i trii Navili classich e l'Olonna
che giren tucc i dì bell bell, pian pian
arent al coeur de sta "Cittaa truscionna"
E quest anben che l'acqua (se se voeur
guardà de fin) l'è minga nè nostrana
nè foresta, nè grama, nè de coeur.
ma semper tosa e semper carampana
L'acqua l'è voeunna sôlla, ciara e tanta:
de mar, de lagh, de foss o de marscida
l'è l'acqua che la serv e che la canta,
l'è l'acqua sôlla, che l'è mai finida;
L'è quella che se bev (de benedì!)
che porta el tifo e che resenta i pagn,
che fa gòd, che ten fresch, che fa stremì
quand furiosa la romp sora i campagn;
L'è quella di turbin e di molin,
che la da el ris e la fa 'ndà i motor,
che fa cristian, in la tinera, el vin;
che porta el ciar, de nott, sora l'amor,
l'è acqua santa, l'acqua del Signor,
di marscid, di riser, di fontanin,
di pociaccher, di pozz, di colador
di sidei, di navazz, di sidelin...
l'è con tutta sta festa d'acqua sana
che se sconfond in ciel
l'ACQUA NOSTRANA.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
