Title: LA VÎSITA

Author:VANDELLI GASTONE
Subject:POETRY
Source:
Download book:
Words Statistic:words statics
 

Number of words for page:
La vîsita

In vatta a un râm
iluminè dal såul,
int na bèla maténna
ed mèz'estèd,
una lumèga
ch'l'à in tèsta una curånna
a quâter côren
la và a truvèr n'amîga
ch'la stà in un'altèna
ala fén dal râm.
Muvàndes länta
pr al teråur d priglèr,
in cl univêrs
ed ramadén e d fói,
lasàndes drî
un fîl d arzänt
cómm una cumatta,
pian pianén sänza fûria
l'arîva ed nòt
a cà dla cunpâgna.

Al tänp ed môver äl côren
pr un salût,
pó stóffa môrta
la s artîra a durmîr
int la cunchégglia,
ch'la manda un riflès cèr
ai râz dla lónna.
Al dé dåpp,
con al spuntèr dal såul,
magnànd un qualinén
par rånper al dzón,
la dîs ala cunpâgna incuriusé
äl nuvitè ch'là vésst
durànt al viâz.

Un salût espansîv
con quâter côren
e pó, guardàndes tótti äl maravai
ed cl univêrs
d ånbra, lûs e culûr,
lasàndes drî un fîl d arzänt
cómm una cumatta,
sänza incâli ne afân,
ma stóffa môrta,
sudisfâta dal viâz,
l'arîva a cà
dóvv, fât d un gnînt,
un suspîr,
un râz ed lónna
al l'aspèta
pr augurèri la bôna nòt.
La lumaghénna
la s arpiâta a durmîr
int la cunchégglia,
mänter int al prè
gréll e zighèl,
in nascundélli d êrba,
in cantn al strèl n'inserenè.

...
Page: 1
 

Help

  • Select one or more words an get availables translation in Logos Dictionary.
  • Set the number of words for each page an refresh the content.
  • Go to begin of the document
  • Go to previous page
  • Go to next page
  • Go to the end of document
  • Libri.it

    MIRALA SIRENETTAIL VIAGGIO DELLA MADREPERLA 3 – L’OMBRA DELLE PIETREKINTSUGI
  • Libri.it
  • Treccani