Fíllm zâl
Dånca: ai é un môrt, un camarîr, un curtèl,
una putèna, dla nàbbia, ai é un lanpiån,
un telêfon ch'al zîga, un pulismàn,
al fûrt d una culèna e d un anèl.
Una spéjja che l'arîva in pajais
ch'la vôl rubèr un còdiz ch'l é zifrè,
un presidänt d na gròsa sozietè
ch'al fà la crassta in vatta ai cónt däl spais.
La prémma dòna, ch'ai piès d andèr a lèt
con di ragâz d vént ân ch'zûg-n a balån,
ch'la cunfånnd un puctén la situaziån
d un delétt, che as dirêv parfèt.
Am pèr che un trêno al pèrta a mezanòt,
che un asensåur as fairma a mèza vî,
pó ai é un ricât, däli ètri bujarî
fâti da un segretèri, ch'l é zuvnòt
ch'al vôl spusèr la fiôla dal padrån
ch'l'erêdita i bajûc dla sozietè.
Pó dla pòra, däl lègrum, dl'omertè,
däli inprånt só un bichîr, un sugamàn,
un arlói ch'l é stè méss un'åura indrî,
cazût, acûs, ufais ch'l é un vitupêri,
mûsica e incuadradûr pénni ed mistêri
e i puliziût ch'i én sänpr in mèz ai pî.
Un ispetåur con péppa e gabardén
ch'al pèr che an sèva gnínt dal fât,
pó al fiôl dl anvåud dla ziénna ch'l êra mât
a se dscrûv, ala fén, ch'l é l asasén.
Al parché dl omizîdi? A n l ò capé:
int l'ûltma fîla con la mî ragâza
a stèvn atais atais con man e fâza.
Ma l é un beléssum zâl, a t al dégg mé.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
