Elicura Chihuailaf
*****************
FEMGECHI XEKALEY ÑI ÜLKANTUN FAW
(DE SUEÑOS AZULES Y CONXASUEÑOS)
*****************
JEJIPUN WENU MAPU ÑI KURANTUMALAL MEW
(Machiül ñi ülkantun)
Tüfa tayiñ kemül gijatupeyem,
pikey ta pu Machi
May, eymün ta kimnieymün:
Pu Logko, Füchakeche ka
pu Wechekeche Wenu Mapu mülelu
Müleymün wünmalechi zeqüñ mew
ka kuyfike Machi ajkütulelu
tayiñ jejipun
Tüfa tañi mülen kuxankülechi
wenxu: neyeley
Kisu xanakünukifilmün
küpalelfiyiñ ta fewla tayiñ lawen
ka, taiñ metawe mew, küpalelfiyiñ
liwen lügko
Küpage!, tayiñ püjü mew
nieyiñ ta mogen wayzüf püle
wixukechi lewfü ñi ko
Pütokoge. Welu ay Genechen
eymi müten ta füskümafimi
Fey mu ka eymi ta zuguwkeyiñ
weza kürüf
Chem weza füxa ügpun
ka zumiñküleymi
epe konchi antü mew
ta miyawkeymi?
Eymi ta zuguwkeyiñ üypüratuchi
küxal
koylatukelu ka ejka narümpelu
kizu ñi age
Ya!, amutuge ka wexofige tati
rügi wülelüñ ma mu pefiel
taiñ fotüm:
Ponon mew, ñi amupeyem ñi mojfüñ
feychi piwke
Weküfü ñi joftuniel zewma
gürü reke, chem weza weraw
müpülechi logko reke
rayülechi qüla reke
kimelpelu ñi müleal wezakezugu
Ñi küme nümün lawen mew amutuge
feypikey ta pu Machi, eymi weza
pewma reke mülekeymi zewma
konün antü mew
nelümge!, kiñepüle künuwge mi pun
leliwülfige Kajfüley
liwen ñi ayliñ
Eymi kay, wixage fotüm
Jejipun pipigey Wenu Mapu
ñi kurantumalal mew
ka nepeyey pu kona ka küpaygün
ka zew küpaygün
Oo! wilüfi pichike chalwa reke
küpalu Wenu Mapu
zewma küpayey ta liwkün füxake
mañke antü.
...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
