Elicura Chihuailaf
*****************
FEMGECHI XEKALEY ÑI ÜLKANTUN FAW
(DE SUEÑOS AZULES Y CONXASUEÑOS)
*****************
KAJFÜ PEWMA MEW
Ñi Kajfü ruka mu choyün
ka ñi xemün wigkul mew müley
wajpaley waje mu, kiñe sause
kamapu aliwen
kiñe pukem chi choz aliwen rümel
xipantü mu kiñe antü ajwe kochü
ulmo reke
ka tuwaymanefi chijko
ta pu pinza
rüf chi kam am xokiwiyiñ, kiñe
rupa künu mekey!
Pukem wamfiñ ñi xanün
ti pu koyam ti jüfkeñ mew
wüzam xipalu
Zum zum nar chi antü mu
xipakiyiñ, pu mawün mu
ka mijakelü nar chi xomü mu
yeme ketuyiñ ufisha
-kiñeke mu gümañpekefiñ
ka kura ñi nüxamkaken ta kujiñ
lan mu egün
weyel külerpun mu pu ko egün
Pun fey ajkütukeyiñ ül, epew
ka fij ramtun
inal küxal mew
neyentu nefiyiñ ti nümün küxal
kofke ñi kuku
ka ñi ñuke ka ñi palu Maria
welu ñi chaw egu tañi laku egu
-Logko lechi lof mewwelu küme az zuwam pukintu keygu
Pichikonagen chi zugu nüxam
kaken welu ayekan chi
pu kom zugu no
Welu fey mu küme kimlu ti ülkantu
xokiwün
Fijantü püram niel chi mogen
welu pichike inakan zugu no
wilüf xipachi küxal, pu ge mu
pu küwü mu
Luku mu metanieenew ñi kuku
ajküken wüne ti kuyfike
zugu tati aliwen egu
ka kura ñi nüxamkaken
ta kujiñ ka ta che egu
Fey kamüten, pikeenew, kimafimi
ñi chum künüwken egün
ka ajküam ti wirarchi zugu ajwe
ejkawün mu kürüf mew
Ñi ñuke reke wüla, kisu
ñüküfkülekey che mu rume
pekan jazkükelay
Fey pekefiñ ñi waj xekayuwken
tuwaykümekey ñi kuliw
poftun mu ti lüg kalifisa
Feyti füw fey küme pun
ga wixalküley küme ñimiñ
zewkülerpuy
Ñi pu peñi ka ñi pu lamgen -zoy
kiñe rupan mew- upa kimfuiñ
feyti ñiminküzaw
welu weza xipan
Welu lonkotukufiñ ñi kimün feyti
ñiminküzaw
fey zuguley ñi chumgechi
ñi ta pu mapuche
ti ...
|
|
|
|
|
|
|
|
|
Go to begin of the document
Go to previous page
Go to next page
Go to the end of document
